17 DE MAIO, DIA DAS LETRAS GALEGAS

Todos os anos, cando maio chega ao día 17 do seu calendario, Galicia rende homenaxe aos seus escritores e poetas celebrando o “Día das Letras Galegas”, que é en realidade todo un ano dedicado a dar a coñecer a obra e vida dos nosos máis significados homes de letras xa falecidos.

Cada ano réndese homenaxe a un dos homes ou mulleres que fixeron posible o esplendor da nosa literatura. Elíxeo a Real Academia Galega desde hai xa 54 anos. Os tres primeiros distinguidos foron Rosalía de Castro, en 1963, Castelao, no 1964 e o bardo Pondal, en 1965.

A partir de aí, un total de 51 egrexias figuras das letras galegas, -que cumpren este ano mil dezasete primaveras-, foron recoñecidas polos académicos e pola xente da cultura de Galicia.

Entre outras figuras, a Real Academia Galega rendeu xa tributo a Curros, Noriega Varela, Otero Pedrayo, Cunqueiro, Blanco Amor, Celso Emilio… e ao propio rei Afonso X o Sabio, autor das Cantigas coas que inicia o seu camiño a arte literaria no noso idioma, o galego.

O galego, que non sempre foi ben aceptado, mírase no espello da nosa  arte literaria que rexorde na diáspora, cando os galegos vivimos a páxina máis triste da nosa historia, escrita polo éxodo da nosa mellor xente, obrigada a deixar o país pola fame ou pola represión política.

A vida e a obra de moitos dos nosos escritores lémbranos que a moitos deles debemos que permanecese viva a chama da nosa cultura, a máis de dez mil quilómetros de distancia.

Este ano 2017, a Real Academia Galega adica a súa anual homenaxe literaria ao escritor Carlos Casares. A sesión extraordinaria celebrarase esta vez en Xinzo da Limia, as once e trinta horas e nela intervirán os académicos Fina Casalderrey, Henrique Monteagudo e mais Alonso Montero. O presidente, Víctor Freixanes, será quen peche o acto.

Carlos Casares naceu en Ourense, no ano 1941, pero ós catro anos foi vivir a Xinzo, de donde era seu pai. A vila e mais toda a comarca deixaron unha fonda pegada na sua vida e na sua obra.